Gipasalig sa kampo ni Vice President Sara Duterte nga andam silang atubangon ang mga alegasyon batok kaniya sa nagpadayon nga impeachment trial.
Kini human magsugod ang Senate impeachment court sa pagpagawas og subpoena aron makuha ang bank records ug tax records sa Bise Presidente. Matud ni defense spokesperson Atty. Michael Poa, wala sila mosupak sa pagpangita sa kamatuoran basta ang tanang proseso subay sa Konstitusyon, balaod ug mga lagda sa korte.
Dugang pa ni Poa, andam usab silang pamatud-an nga walay basehan ang alegasyon sa giingong unexplained wealth ni VP Sara. Lakip sa gipadalhan og subpoena ang Bureau of Internal Revenue (BIR), Anti-Money Laundering Council (AMLC), ug pipila ka mga bangko, nga gihatagan hangtod Hulyo 30 aron mosumite sa gipangayong mga dokumento.
