GENSAN- Nagpahinumdom ang Office of Civil Defense Region 12 ngadto sa mga residente sa SOCCSKSARGEN aron magpabiling alerto tungod sa posibleng epekto sa kusog nga pag-ulan, ilabina sa mga nagpuyo duol sa baybayon, coastal areas, ug mga sapa.
Sumala ni OCD-12 Information Officer Beverly Anne Santos, mas maayo nga ang mga residente nga nagpuyo sa peligro nga mga lugar mangita og mas luwas nga dapit o mobalhin sa mas taas nga lugar kung gikinahanglan.
Gidasig usab niya ang katawhan nga sundon ang direktiba sa mga lokal nga panggamhanan kung adunay ipagawas nga pre-emptive evacuation, aron malikayan ang posibleng kadaot ug pagkawala sa kinabuhi.
Pahimangno ni Santos nga magdala lamang og importanteng mga gamit kung kinahanglan nga mobakwit, ug magpabiling lamang sa sulod sa ilang balay kung adunay suspensyon sa klase o trabaho tungod sa peligro sa panahon.
Gidasig usab niya ang publiko nga kanunay nga mosubay sa opisyal ug kasaligan nga impormasyon gikan sa DOST-PAGASA, mga awtoridad, ug mga media partners.
Gipahinumdoman usab sa OCD-12 ang publiko nga likayan ang pagtabok sa mga sapa, ug lugar nga kusog ang agas sa tubig, ilabina kung molapas na sa tuhod ang lebel sa baha.
Gidili usab ang paglakaw, pagmaneho, paglangoy, o pagsakay og bangka sa mga lugar nga gibahaan o nag-awas nga mga sapa aron malikayan ang disgrasya.
Matud sa OCD-12, mao kini ang ilang importanteng pahimangno sa katawhan sa SOCCSKSARGEN samtang nagpadayon ang pagbantay sa kahimtang sa panahon.
