Giklaro sa tigpamaba sa impeachment court nga si Atty. Regie Tongol nga dugay nang andam ang desisyon sa impeachment court may kalabotan sa pagkuha sa bank ug tax records ni Vice President Sara Duterte.
Sa usa ka press briefing, gipatin-aw ni Tongol nga sa unang adlaw pa lamang sa impeachment trial, andam na unta si Senate Impeachment Court Presiding Officer Sen. Francis “Chiz” Escudero nga magpagawas og desisyon kabahin sa hangyo sa House prosecution panel nga ipagawas ang subpoena alang sa bank records sa Bise Presidente.
Apan, gi-postpone kini human mangayo ang prosecution panel og bag-ong subpoena, samtang nangayo usab ang depensa og higayon nga masusi ang maong kahikayan sa subpoena. Tungod niini, nagpahigayon una og oral arguments ang korte sa dili pa mopagawas sa pinal nga desisyon.
Lakip sa sakop sa desisyon ang pagkuha sa bank records, Anti-Money Laundering Council records, ug pipila ka tax records ni Vice President Duterte ug sa iyang bana nga si Atty. Manases Carpio.
Matod ni Tongol, ipagawas ang subpoena ngadto sa mga may kalabutan nga ahensya. Giklaro usab niya nga gikinahanglan pa ang pagtugot sa Presidente sa dili pa ipagawas sa Bureau of Internal Revenue ang tax records sa Bise Presidente.
Sumala sa balaod, adunay mga kondisyon nga kinahanglan matuman una pa maablihan ang tax records sa usa ka taxpayer.
