Gipahibalo ni Ombudsman Jesus Crispin “Boying” Remulla nga hapit na nila ipasang-at ang kasong plunder batok kang kanhi House Speaker Martin Romualdez, apan adunay mga proseso pa nga kinahanglan tapuson sa ilang opisina.
Matud ni Remulla, human sa fact-finding stage, mosulod pa ang kaso sa preliminary investigation subay sa gitakdang proseso sa balaod aron masiguro ang hustong pagdumala sa kaso ug mapanalipdan ang katungod sa mga posibleng akusado.
May kalabotan ang maong kaso sa imbestigasyon sa giingong anomalya sa mga flood control projects sa gobyerno, diin nalambigit ang ngalan ni Romualdez.
Gipasabot usab ni Remulla nga wala pa siya maghatag og tukmang petsa kung kanus-a pormal nga maisampa ang maong kaso batok kang Romualdez nga representante sa unang distrito sa Leyte.
