Gipasabot ni Atty. Rogelio Garcia, Regional President sa PDP Laban, nga wala siyay nakita nga mahinungdanong pahayag o importante nga statement si NBI Regional Director Jeremy Lotoc atol sa impeachment trial ni Vice President Sara Duterte.
Matod ni Garcia, ang testimonya ni Lotoc nagtumong lamang sa pagpasabot sa papel sa National Bureau of Investigation (NBI) sa pag-imbestigar sa mga pahayag nga nahimo ni Vice President Duterte nga usa sa gigamit nga ebidensya alang sa grave threat.
Giingon niya nga ang trabaho sa NBI mao lamang ang pagsusi ug pagdiskubre kon tinuod ba o adunay basehan ang mga pahayag nga gihimo sa Bise Presidente, isip kabahin sa ilang opisyal nga imbestigasyon.
Dugang pa ni Garcia, wala’y gipresentar nga bag-ong ebidensya o diretsong pamatuod nga mahimong magpalig-on sa mga alegasyon batok kang Duterte.
Busa, matod niya, dili angay hatagan og sobra nga kahulugan ang testimonya ni Lotoc.
Nagpadayon sa pagkakaron ang impeachment trial sa Senado diin nagpresentar na ang prosecution sa ilang mga testigo ug ebidensya, samtang nagpaabot usab ang depensa sa higayon aron motubag sa mga alegasyon.
