Naglaom si Impeachment Court Presiding Officer ug Senate President Francis Escudero nga masulbad na sa Korte Suprema ang isyu sa gidaghanon sa mga boto nga gikinahanglan aron mahatagan og hukom ang usa ka respondent sa impeachment trial, sa dili pa magpagawas og pinal nga desisyon ang Senado sa kasamtangang pagdungog batok kang Bise Presidente Sara Duterte.
Matud ni Escudero, ang kasamtangang basihan sa impeachment court nagpabiling 16 ka boto o two-thirds sa kinatibuk-ang 24 ka miyembro sa Senado, subay sa Konstitusyon ug sa naglungtad nga desisyon sa Korte Suprema sa kasong Bayan v. Zamora.
Gipasabot niya nga bisan pa og 21 lamang ang aktibong mga senador sa pagkakaron, tungod kay naa sa kustodiya sila Senators Jinggoy Estrada ug Rodante Marcoleta, samtang wala gihapon motambong si Senator Ronald “Bato” dela Rosa, ang basihan sa two-thirds vote nagpabiling ang kinatibuk-ang 24 ka puwesto sa Senado.
Gipasiugda usab ni Escudero nga wala siyay nakuha nga kasabutan gikan sa ubang mga senador bahin sa maong isyu, kondili iyang gipresentar lamang ang iyang legal nga interpretasyon base sa naglungtad nga balaod.
Dugang niya, mas maayong masulbad na sa Korte Suprema ang maong isyu kon adunay mapasang-at nga petisyon samtang nagpadayon pa ang impeachment trial, aron malikayan ang panibag-ong legal nga panaglalis kon makapagawas na og desisyon ang impeachment court.
Matud pa ni Escudero, ang tumong sa impeachment process mao ang paghuman sa mga isyung giatubang sa nasud ug dili ang pagmugna og bag-ong legal nga panagbangi human sa trial.
