Miabot na sa 230 ka pamilya ang gipahawa gikan sa ilang mga panimalay ug gipapuyo sa nagkalain-laing evacuation centers sa lungsod sa Malapatan human sa pagbaha ug landslide nga nahitabo sa padayon nga kusog nga ulan dala sa Super Typhoon Inday.
Base sa pinakabag-ong report sa Municipal Disaster Risk Reduction and Management Office (MDRRMO), apektado ang mga barangay sa Poblacion, Libi, ug Sapu Padidu, ilabina sa mga lugar sa Purok Lanang, Purok 1, Purok 8-A, ug Molo-B.
Ang mga apektadong pamilya temporaryong gipapuyo sa Municipal Gymnasium, Malapatan Central Elementary School, Lanang Covered Court, Malapatan National High School, Purok Luot Court, ug Libi Covered Court.
Pinakadaghan sa mga evacuees anaa sa Malapatan National High School nga adunay 54 ka pamilya, gisundan sa Lanang Covered Court nga adunay 52 ka pamilya, ug Malapatan Central Elementary School nga adunay 51 ka pamilya.
Samtang, sa initial nga assessment sa kadaot sa kabalayan, duha ka balay sa Barangay Daan Suyan ang gikumpirmang total loss tungod sa maong kalamidad.
Padayon ang monitoring ug response operations sa lokal nga panggamhanan ug MDRRMO aron masiguro ang kaluwasan sa mga residente ug mahatagan dayon og tabang ang tanang naapektuhan sa pagbaha ug landslide.
