Naapektuhan sa padayon nga pag-ulan ang usa ka konkretong guard gutter sa Purok 5, Barangay Lawili, Aleosan, North Cotabato, human kini maguba ug nabuak ang bahin sa estruktura.
Naapil usab sa kadaot ang usa ka bahin sa karsada sa maong lugar. Base sa obserbasyon sa mga residente, nahuyang ang yuta sa palibot sa guard gutter tungod sa walay hunong nga pag-ulan sa milabay’ng pipila ka adlaw, nga maoy hinungdan sa pagkaguba niini. Walay natalang nasamdan o kadaot sa mga sakyanan ug kabtangan sa maong insidente.
Gilauman ang pag-abot sa mga hingtungdan nga awtoridad aron mohimo og mas detalyadong inspeksyon ug mahibal-an ang tinuod nga hinungdan sa pagkaguba sa estruktura.
Lakip sa ilang susihon ang kahimtang sa konstruksyon aron masiguro ang kaluwasan sa mga residente sa maong lugar.
Samtang, padayon nga gipahimangnoan ang mga lumulupyo nga magmatngon, ilabina sa mga lugar nga padayon nga naapektuhan sa walay hunong nga pag-ulan.
