Giklaro ni Associate Justice Karl Miranda, Chairperson sa Sandiganbayan Third Division nga nagdumala sa kasong plunder batok kang Senador Rodante Marcoleta, nga ang paggawas sa warrant of arrest dili pa nagpasabot nga adunay pinal nga hukom batok sa senador.
Matod ni Miranda, kini ang unang higayon sulod sa iyang napulo ka tuig nga pagserbisyo sa Sandiganbayan nga mipagawas siya og publiko nga pahayag aron ipatin-aw ang desisyon sa korte.
Gipasiugda niya nga ang warrant of arrest nagpasabot lamang nga nakakita ang korte og probable cause o igo nga basihan aron tuohan nga posibleng nahimo sa mga akusado ang krimeng gipasangil kanila.
Bisan pa niini, nagpabilin nga adunay presumption of innocence ang tanang akusado hangtod nga mapamatud-an ang ilang sala pinaagi sa hustong proseso sa korte.
Human sa paggawas sa warrant of arrest, nadakpan na ang tanang mga akusado. Gibalhin sa New Quezon City Jail sa Payatas sila kanhi Anakalusugan Party-list Representative Mike Defensor, Joseph Espiritu, ug Aristotle Viray.
Samtang, nagpabilin sa Philippine National Police General Hospital si Senador Rodante Marcoleta human makasinati og kasakit sa dughan ug taas nga presyon sa dugo.
Sa katapusan, gipahinumdoman ni Associate Justice Karl Miranda si Senador Marcoleta ug ang duha ka kampo nga tahuron ang integridad sa hudikatura ug ang husto nga pagdumala sa hustisya.
