Gibalik na sa Bureau of Internal Revenue (BIR) ang kontrobersyal nga green box nga naglangkob sa tax records ni Vice President Sara Duterte ug sa iyang bana nga si Atty. Manases Carpio.
Ang maong box una nang gitugyan sa House of Representatives ug sa ulahi gipasa sa Senado aron unta mahimong kabahin sa ebidensiyang ipresentar sa House Prosecution Panel batok kang VP Sara sa impeachment trial.
Una nang gimando ni Presiding Officer Sen. Francis “Chiz” Escudero ang pagbalik sa maong box ngadto sa BIR tungod kay wala’y court order nga nagtugot sa legal nga pagbalhin sa kustodiya niini ngadto sa Senado.
Gipangulohan ni Senate Secretary ug concurrent Clerk of Court Renato N. Bantug Jr., pinaagi sa Office of the Sergeant-at-Arms (OSAA), ang pagbalik sa maong green box ngadto sa opisina sa BIR sa Quezon City karong adlawa, Hulyo 7, 2026.
