Gibutyag ni House prosecution spokesperson ug Lanao del Sur Rep. Zia Alonto Adiong nga ang unmodified opinion sa Commission on Audit para sa 2025 dili makawagtang sa mga isyu may kalabotan sa confidential funds sa Office of the Vice President sa miaging mga tuig.
Sumala ni Adiong, nagpabilin nga lig-on ang ebidensya sa prosekusyon sa tanang articles of impeachment, lakip na ang giingong dili husto nga paggamit ug liquidation sa confidential funds.
Gipatin-aw usab niya nga ang audit opinion para sa 2025 lahi ug dili kini makatubag sa mga naunang findings sa COA, lakip ang panawagan nga ipabalik ang mga kantidad nga giingong kuwestiyonable.
Gipadayag usab ni Adiong ang mga isyu sa acknowledgement receipts nga gisumite sa OVP ug ang ngalan nga “Mary Grace Piattos” nga mitumaw sa mga dokumento, nga aniya kinahanglan pa klarohon pinaagi sa testimonya ug ebidensya sa impeachment trial.
Nakatakdang magsugod ang Senado sa impeachment trial ni Bise Presidente Sara Duterte sa Lunes, Hulyo 6.
