Naka-full alert ang Philippine National Police human sa gireport nga emergency rally sa usa ka religious organization sa EDSA karong Martes, Hunyo 30.
Matod sa PNP, hugot nga gimonitor ni PNP Chief General Jose Melencio Nartatez Jr. ang kahimtang gikan sa PNP Command Center, samtang anaa gihapon sa lugar ang mga police units aron siguruhon ang kalinaw, kahapsay ug kaluwasan sa publiko.
Nagpadayon usab ang koordinasyon sa mga awtoridad aron mamintina ang hapsay nga dagan sa trapiko ug mapanalipdan ang katungod sa mga nagprotesta.
Base sa crowd estimate sa People Power Monument sa EDSA-White Plains, miabot sa kapin 7,000 ka mga tao ang nagtigom sa maong lugar kaniadtong buntag.
Sumala kang NCRPO Regional Director Maj. Gen. Anthony Aberin, wala pa makapakita og permit ang grupo nga nagtugot kanila sa pagpahigayon sa maong tigom, nga nakaapekto sa mga motorista ilabi na atol sa morning rush hour.
Una nang gipahayag sa Iglesia ni Cristo (INC) ang ilang dili pag-uyon sa umaabot nga pagsang-at og plunder case batok kang Senador Rodante Marcoleta.
Gipasiugda usab sa grupo nga dili sila mohunong sa ilang panawagan alang sa hustisya bisan pa man kun mahatagan og kaso o makulong ang senador.
