Dakpan human sa kapin unom ka bulan nga pagpangita sa mga operatiba sa Criminal Investigation and Detection Group o CIDG-Sarangani ang usa ka pastor nga wanted sa regional level tungod sa kasong statutory rape.
Nadakpan ang suspek, nga giila lamang sa alyas nga “Mikoy,” atol sa gilusad nga Oplan Pagtugis sa Malapatan, Sarangani Province.
Sumala kang PMaj. Julius Vallejo, Provincial Officer sa CIDG-SarGen, giserbisyohan ang suspek sa warrant of arrest nga gipagawas sa Regional Trial Court, Branch 13 sa Polomolok, South Cotabato may kalabotan sa kasong statutory rape nga gisang-at niadtong Disyembre 16, 2025.
Base sa imbestigasyon, ang biktima ug reklamante adunay relasyon sa suspek isip kapamilya, ug giingong makadaghang higayon nga nahitabo ang giingong pagpanglugos sulod mismo sa ilang panimalay.
Gibutyag usab sa CIDG nga duha ka higayon nilang gisulayan ang pagserbisyo sa warrant of arrest, apan wala nila maabti ang suspek sa unang operasyon.
Samtang, nakurat ang pamilya sa suspek sa kasong iyang giatubang, ilabina kay nailhan kini isip aktibong pastor ug dedikado sa ministeryo. Bisan pa niini, giingon sa pamilya nga motahod sila sa proseso sa balaod ug andam nga modawat sa mahimong desisyon sa korte.
Sa pagkakaron, anaa na sa kustodiya sa CIDG ang suspek ug nag-atubang sa kasong statutory rape samtang nagpadayon ang legal nga proseso.
