Mobisita si Pangulong Ferdinand Marcos Jr. sa Canada gikan sa Hulyo 1 hangtod Hulyo 4 aron makigtagbo kang Prime Minister Mark Carney isip kabahin sa paningkamot sa pagpalig-on sa kooperasyon ug relasyon tali sa duha ka nasod.
Lakip sa ilang hisgutan ang dugang nga panagtinabangay sa mga sektor sa depensa, seguridad, ug pamatigayon, ingon man ang pagpalambo sa economic resilience, enerhiya, critical minerals, ug uban pang mga prayoridad sa ekonomiya.
Gilauman usab nga mapulihan sa ilang panagtagbo ang papel sa Pilipinas isip chair sa Association of Southeast Asian Nations ug ang mga prayoridad sa rehiyon.
Nahibaluan nga ang Canada nahimong Dialogue Partner sa ASEAN sukad pa niadtong 1977 ug opisyal nga nahimong Strategic Partner niadtong 2023.
Sumala sa opisina ni Prime Minister Carney, hisgutan usab sa duha ka lider ang pagpadali sa negosasyon alang sa Canada–Philippines Free Trade Agreement ug Canada–ASEAN Free Trade Agreement, nga gitinguha nga mahuman sulod ning tuiga samtang ang Pilipinas maoy nagdumala sa ASEAN.
Gilauman usab nga makigtagbo si Presidente Marcos sa mga Canadian business leaders ug mga potensyal nga mamumuhunan nga nalambigit sa information technology o IT, business process management o BPM, artificial intelligence o AI, critical minerals, ug uban pang high-growth industries, subay sa giingon sa Presidential Communications Office.
Kauban ni Presidente Marcos si First lady Liza Araneta-Marcos sa pagpakigkita sa mga miyembro sa komunidad sa mga Pilipino sa Vancouver, British Columbia, isip kabahin sa iyang opisyal nga pagbisita sa Canada.
