Gikumpirma sa Ateneo de Manila University kagahapon, Huwebes nga luwas nang naabot sa Nigeria ang lawas sa namatay nga student-athlete nga si Divine Adili.
Gipadayag sa Ateneo nga malampuson nga nauli ang lawas ni Adili ngadto sa iyang nasod pinaagi sa tabang sa nagkadaiyang indibidwal ug mga institusyon nga mitabang sa proseso sa repatriation.
Kahinumdoman nga namatay si Adili uban sa iyang kapwa student-athlete nga si Rene Clert Baterbonia human sila gituohang nalumos atol sa usa ka team-building activity sa Ateneo Men’s Basketball Team sa lungsod sa Dipaculao, Aurora niadtong Hunyo 8.
Sumala sa unibersidad, giubanan ni Fr. Sigmund “Munching” de Guzman, SJ ang labi ni Adili sa tibuok biyahe paingon sa Nigeria ug personal usab nga nakigduyog sa pamilya niini sa ilang pagdawat sa iyang patayng lawas.
Matod pa sa Ateneo, “Our University representative, Fr. Sigmund ‘Munching’ de Guzman, SJ accompanied Divine throughout his journey home and later traveled to be with the Adili family as they received their son.”
Gipahibalo usab sa unibersidad nga nagpaabot og dakong pasalamat ang mga ginikanan ni Adili ngadto sa tibuok komunidad sa Ateneo ug sa tanang mitabang aron mauli ang ilang anak nga may dignidad ug pagtahod.
Nagpasalamat usab ang Ateneo sa Embassy of Nigeria in Manila alang sa bililhong suporta niini sa tibuok proseso sa repatriation.
Samtang, gilubong na si Baterbonia sa iyang lungsod sa Talacogon niadtong Hunyo 24, samtang nagpadayon ang pagbangotan sa iyang pamilya, mga higala, ug sa tibuok komunidad sa Ateneo tungod sa pagkawala sa duha ka mga atleta.
