Nakabalik nasa nasud ang 24 ka mga Pilipinong trabahante nga natanggong sa Russia sulod sa halos siyam ka bulan human sa direktang panagsulti tali ni Presidente Ferdinand Marcos Jr. ug Presidente Vladimir Putin sa Russia.
Sumala sa Department of Foreign Affairs (DFA), ang unang unom ka mga Pilipino miabot sa Ninoy Aquino International Airport (NAIA) mga alas 12 sa tungang gabii, samtang ang 18 pa misunod mga alas 3:50 sa kaadlawon.
Giabiabi sila sa mga opisyal sa DFA nga gipangulohan ni Foreign Affairs Secretary Ma. Theresa Lazaro.
Nahibal-an nga ang mga Pilipino natanggong sa Russia tungod sa giingong mga isyu sa imigrasyon ug nga sila mga biktima sa ilegal nga recruitment.
Sumala sa DFA, personal nga gihangyo ni Presidente Marcos ang ilang kaso gikan kang Putin atol sa usa ka bilateral meeting sa Kazan niadtong Hunyo 17, diin ang Presidente nagpahayag sa iyang dakong kabalaka sa sitwasyon sa mga Pilipino.
Sa sinugdanan, si Putin miingon nga wala siya dayon nahibalo sa sitwasyon, apan sa ulahi gipahibalo nga ang mga awtoridad nakasubay na sa mga Pilipino ug nakit-an nga wala silay giatubang nga mga kaso.
Tungod niini, ang mga awtoridad sa Russia mihimo dayon og aksyon aron buhian sila niadtong Hunyo 19, nga nagtapos sa siyam ka bulan nga pagkabilanggo.
Nagpasalamat ang gobyerno sa Pilipinas sa gobyerno sa Russia sa dali nga aksyon niini, samtang ang DFA, Department of Migrant Workers, ug OWWA mipasalig og tabang para sa ilang hapsay nga pagpauli ug reintegration.
