GENSAN- Nagpadayon ang City Government sa General Santos sa paghatag og suporta sa mga empleyadong naapektuhan sa linog pinaagi sa tabang gikan sa Department of Labor and Employment (DOLE).
Sumala kang City Administrator Shandee Pestaño, nakapagawas na og ayuda ang DOLE alang sa pipila ka mga empleyado sa dagkong establisemento sama sa mga mall nga unang nakasumite sa lista sa ilang mga trabahante nga naapektuhan.
Dugang niya, nagdawat usab karon og mga aplikasyon ang Public Employment Service Office (PESO) gikan sa gagmay ug medium nga negosyo nga nanginahanglan og tabang alang sa ilang mga empleyado tungod kay wala pa makabalik sa normal nga operasyon ang ilang mga negosyo.
Gihangyo ni Pestaño ang mga kompanya ug negosyante nga moduol sa PESO aron masumite ang ilang mga dokumento ngadto sa DOLE alang sa dugang nga ayuda.
Sa pagkakaron, ang temporaryong opisina sa PESO nahimutang sa Dadiangas West Elementary School diin mahimong moduol ang mga nanginahanglan.
