GENSAN- Giandam na sa lokal nga panggamhanan sa General Santos City ang temporaryong balhinan alang sa mga vendor sa public market nga naapektuhan sa kasamtangang sitwasyon sa merkado.
Matud ni City Administrator Shandee Pestaño, dili pa mahimong pasudlon ang pipila ka bahin sa public market tungod kay wala pa kini matugoti alang sa operasyon ug padayon pa ang mga inspeksyon sa kahimtang sa istruktura.
Tungod niini, gibutang sa gawas nga bahin sa merkado ang mga vendor aron makapadayon gihapon sila sa ilang pagpamaligya. Gibutyag usab ni Pestaño nga nagpahigayon og committee hearing ang Sangguniang Panlungsod nga gipangulohan ni Councilor Richard Atendido aron hisgutan ang temporaryong pagsirado sa usa ka lane sa P. Acharon Boulevard ug gamiton kini isip temporaryong relocation site alang sa mga vendor sa public market.
Sumala kaniya, nagpadayon na usab ang paghimo sa relocation building nga maoy pagabalhinan sa mga negosyante. Bisan dili pa kini makita sa lugar sa pagkakaron, gipatin-aw niya nga ang ubang bahin sa konstruksyon gihimo pa sa laing lokasyon ug i-instalar lamang sa P. Acharon Boulevard kung andam na.
Miingon si Pestaño nga mas napadali ang pagbalhin sa mga vendor tungod sa wala damhang kalamidad nga miigo sa syudad, busa nangayo siya og pagsabot ug pasensya gikan sa mga apektadong mga negosyante.
Dugang niya, gilauman nga mokabat og duha ka bulan ang pagkompleto sa relocation area, ilabina alang sa mga vendor sa fish section, aron masiguro nga adunay luwas ug hapsay nga lugar nga ilang mabalhinan samtang nagpadayon ang mga lakang sa rehabilitasyon sa public market.
