Gipanghimakak ni Senador Christopher “Bong” Go nga aduna siyay gilapas nga balaod ug iyang gitugyan na lamang sa Diyos ang tanan, human sa mga taho nga giingong nagpagawas ang International Criminal Court (ICC) og warrant of arrest batok kaniya.
Matud ni Go, wala gayud naapil sa iyang mandato ang mga butang may kalabotan sa operasyon sa kapulisan ug naglaum siya nga dili mahimong politikal ang maong isyu.
Nagsugod ang maong isyu human miingon si Davao City First District Representative Paolo “Pulong” Duterte nga adunay impormasyon siya nga giingong nagpagawas ang ICC og arrest warrant batok kang Go ug duha pa ka kanhi opisyal sa kapulisan.
Apan, gipahayag sa Department of the Interior and Local Government (DILG) nga wala pa sila makadawat og pormal nga pahibalo kabahin niini.
Si Go ug si Senador Ronald Dela Rosa gilakip sa mga opisyal nga giingong ginganlan sa ICC nga adunay posibleng responsibilidad sa mga krimen batok sa katawhan nga may kalabotan sa war on drugs sa kanhing administrasyon ni Pangulong Rodrigo Duterte.
Samtang, gipanghimakak pag-usab ni Go ang mga alegasyon ug miingon nga wala siyay bisan unsang kalambigitan, kahibalo, o awtoridad sa mga pasangil nga gipasaka batok kaniya.
