GENSAN- Giklaro ni DSWD Region XII Regional Director Loreto Cabaya nga “house-to-house” ang pamaagi sa pag-apud-apod sa mga food packs ug non-food items ngadto sa mga dapit nga naapektuhan sa kalamidad dinhi sa syudad.
Pinaagi sa pakigtambayayong sa mga sectoral officials sa matag barangay, ginasiguro sa ahensya nga moabot ang hinabang sa mga pamilyang nanginahanglan.
Matod pa ni Dir. Cabaya kung aduna may mga residente nga wala makadawat sa maong ayuda, mamahimo silang mosumbong o modangop direkta sa ilang buhatan aron maaksyonan ug ma-verify kung ngano nga nalabyan kini sa pag-apud-apod sa barangay level.
Gipasalig usab sa direktor nga dako ang supply sa maong food packs ug andam silang mopuno pa base sa tinuod nga demand sa katawhan sa GenSan.
Gawas sa pagkaon, nang-apud-apod usab ang DSWD og Emergency Cash Transfer alang sa mga nakasinati og danyos sa balay ug kadtong mga trabahante sa mall nga naapektuhan ang panginabuhian.
