Nahimong dakong hagit sa lokal nga panggamhanan sa General Santos City ang mga nadaot nga mga building human sa magnitude 7.8 nga linog nga miigo sa Mindanao niadtong miaging semana.
Sumala kang Kagawad Jeng Gacal, naapektuhan sa linog ang Sangguniang Panlungsod building diin temporaryo nga dili pa magamit ang ilang opisina.
Bisan pa niini, gipahayag ni Gacal nga nagpadayon gihapon ang ilang trabaho aron masiguro ang paghatag og serbisyo sa publiko.
Niadtong miaging semana, nagpahigayon sila og session sa open area sa parking lot sulod sa city hall compound tungod kay dili pa luwas gamiton ang ilang opisina.
Dili usab magamit sa pagkakaron ang main city hall building ug investment building, hinungdan nga gibalhin sa ubang lugar ang pipila ka opisina sa lokal nga panggamhanan.
Nagpadayon ang pagpangita sa temporaryong opisina samtang gihimo ang inspeksyon ug assessment sa mga building nga naapektuhan sa kusog nga linog.
