Misaka na sa 14 ka lokal nga panggamhanan ang nagdeklara og state of calamity human sa magnitude 7.8 nga linog nga miigo sa Mindanao niadtong Hunyo 8.
Sumala sa Office of Civil Defense o OCD, lakip sa mga apektadong lugar ang pipila ka lungsod sa Davao Occidental, Sarangani ug South Cotabato.
Tungod sa deklarasyon, mapaspasan ang pagpalit sa mga relief goods ug uban pang kinahanglanon aron matabangan dayon ang mga apektadong residente.
Gipatuman usab ang price freeze sa mga nag-unang palaliton aron malikayan ang pagsaka sa presyo sa panahon sa krisis.
Base sa pinakabag-ong datos sa National Disaster Risk Reduction and Management Council, kapin 176,000 ka pamilya o labaw sa 736,000 ka indibidwal ang naapektuhan sa linog.
Mikabat na usab sa 65 ang namatay, samtang kapin 57,000 ka balay ang naguba, diin labaw sa 10,000 niini ang hingpit nga nahugno.
Giila sa OCD nga dakong hagit karon ang dinaliang pagpatukod pag-usab sa mga balay ug ang pagsiguro kung luwas pa bang puy-an ang mga komunidad nga naapektuhan.
Nakigtambayayong na usab ang ahensya sa Mines and Geosciences Bureau aron masuta kon adunay mga residente nga kinahanglan ibalhin ngadto sa mas luwas nga mga lugar.
