Padayon ang mga paningkamot sa gobyerno aron masiguro ang pagpadayon sa pag-eskwela ug komunikasyon sa mga eskwelahan nga naapektuhan sa magnitude 7.8 nga linog sa Southern Mindanao.
Lakip sa mga natala nga adunay kadaot ang Technical-Vocational Building sa Malapatan National High School sa Malapatan, Sarangani, nga nadaot tungod sa kusog nga paglinog.
Giinspeksyon ang kahimtang sa maong building atol sa pagbisita ni Ferdinand Marcos Jr. sa lugar. Usa usab ka Starlink unit ang gihatag aron makatabang sa komunikasyon sa eskwelahan samtang nagpadayon ang rehabilitasyon.
Samtang, gimandoan usab ang mga may kalabutang ahensya nga paspasan ang pag-ayo sa mga pasilidad nga naapektuhan aron dali nga mabalik sa normal ang operasyon ug pagpanudlo sa maong eskwelahan.
Padayon karon ang pag-assess sa kadaot sa ubang mga eskwelahan sa mga lugar nga naapektuhan sa linog aron matino ang mga kinahanglanong pag-ayo ug suporta alang sa mga estudyante ug magtutudlo.
