Gisentensiyahan sa Oslo District Court si Marius Borg Høiby, stepson ni Crown Prince Haakon sa Norway, og upat ka tuig nga pagkabilanggo human mapamatud-an nga sad-an sa pagpanglugos, domestic violence, ug uban pang mga krimen.
Sa usa ka desisyon nga gi-isyu niadtong Lunes human sa pito ka semana nga husay, si Høiby nakitang sad-an sa 34 sa 40 ka mga kaso batok kaniya, lakip ang duha ka ihap sa pagpanglugos ug daghang mga insidente sa pag-atake sa iyang kanhing uyab.
Usa sa mga pagpanglugos giingong nahitabo sa silong sa pinuy-anan sa Crown Prince.
Sumala sa korte, usa sa mga biktima dili makasulti o makasukol tungod sa iyang kondisyon sa panahon sa insidente.
Gawas sa pagpanglugos ug pag-atake, si Høiby nakitang sad-an usab sa paghupot ug pag-apod-apod sa droga, ingon man paglapas sa mga restraining order ug uban pang mga kaso. Bisan pa, gi-abswelto siya sa duha pa ka mga kaso sa pagpanglugos.
Atol sa husay, migawas ang ebidensya lakip ang mga electronic message, video recording, ug testimonya nga naglambigit kaniya sa paggamit og droga ug bayolenteng pamatasan.
Nagplano ang kampo ni Høiby nga iapela ang desisyon sa korte.
Sumala sa prosekusyon, ang kaso usa ka pruweba nga walay bisan kinsa—bisan unsa pa ang kahimtang sa katilingban—ang labaw sa balaod.
Ang harianong panimalay sa Norway wala pa mopagawas og pahayag, nga nag-ingon nga ang kaso anaa na karon sa mga kamot sa korte.
Si Høiby walay opisyal nga titulo o posisyon sa harianong pamilya, apan ang kaso nakahatag og dakong kontrobersiya sa Norway ug nakaapekto sa imahe sa harianong pamilya.
