Gikumpirma sa Department of Foreign Affairs nga adunay nakatakda nga bilateral meeting si Pangulong Ferdinand Marcos Jr. ug Russian President Vladimir Putin.
Sa pre-departure briefing sa Malacañang, gipahayag ni DFA Assistant Secretary Dominic Imperial nga kabahin kini sa pagsaulog sa ika-50 nga anibersaryo sa diplomatic relations tali sa Pilipinas ug Russia. Matod ni Imperial, sa maong bilateral meeting gilauman nga hisgutan sa duha ka lider ang mga paagi aron mas mapalig-on pa ang kooperasyon sa ilang mga nasud ilabina sa sektor sa enerhiya ug seguridad sa suplay sa pagkaon.
Tutokan usab sa panagtagbo nila ni Pangulong Putin ang pipila ka importante nga rehiyonal ug internasyonal nga mga isyu, lakip na ang epekto sa nagpadayon nga krisis sa Middle East ngadto sa seguridad sa enerhiya ug pagkaon sa nagkalain-laing nasud. Wala usab giunhan ni Imperial ang posibleng resulta sa maong panagtagbo kon adunay mapirmahang kasabutan kalabot sa suplay sa lana, nuclear energy, o renewable energy, ug matod niya mas maayong hulaton na lamang ang mahimong kasabutan sa duha ka mga lider.
Dugang pa niya, kabahin usab sa bilateral meeting ang pagpalambo sa kooperasyon tali sa Pilipinas ug Russia sa larangan sa turismo, edukasyon, kultura, siyensya ug teknolohiya, ingon man pagpalig-on sa relasyon sa mga katawhan sa duha ka nasud.
