Nagpadayon ang recovery operation sa Purok Anonang, Barangay Rio del Pilar sa Glan, Sarangani alang sa usa ka residente nga natabonan sa mga nahugno nga istruktura tungod sa kusog nga linog.
Ang operasyon gipangulohan sa Collapse Structure Search and Rescue o CSSR Team gikan sa Davao de Oro uban sa mga sundalo sa 73rd Infantry Battalion, Philippine Red Cross, Police Auxiliary, Bagani Warrior volunteers ug uban pang ahensya.
Gitinguha sa mga responder nga marekober ang lawas ni Danny Ferrer nga gituohang natabonan sa nahugno nga estruktura.
Apan, temporaryong gipahunong ang operasyon human miigo ang magnitude 5.7 nga aftershock nga nagbutang sa peligro sa mga rescuer ug volunteers.
Bisan pa niini, gipasalig sa mga otoridad nga ipadayon ang recovery mission sa higayon nga masiguro ang kaluwasan sa lugar pinaagi sa padayong pag-assess sa kahimtang sa yuta ug sa mga nahabiling istruktura.
