Mokabat sa kapin 30 ka mga testigo ang ipasaka sa House prosecution panel sa impeachment trial batok kang Bise Presidente Sara Duterte.
Sumala ni Batangas Rep. Gerville “Jinky Bitrics” Luistro, lead prosecutor ug chair sa House Committee on Justice, ipresentar sa ilang team ang listahan sa mga testigo isip kabahin sa ilang pre-trial brief sa Senate Impeachment Court.
Giingon ni Luistro nga gipalapad nila ang listahan aron masiguro nga kompleto ang mga testimonya nga magpasiugda sa ilang kaso.
Matud pa niya, base sa rules sa impeachment, ang mga testigo nga wala maapil sa pre-trial mahimong dili na tugotan nga motestigo sa main trial.
Apan klaro usab sa mga prosecutors nga tugotan gihapon ang dili pag-ngalan sa pipila ka testigo ug dokumento alang sa ilang seguridad, basta mahatag ang deskripsyon sa ilang katungdanan ug ang kahulugan sa ilang testimonya.
Gilauman nga ipresentar sa prosekusyon ang mga opisyal ug mga rekord sa bangko isip ebidensya kalabot sa alegasyon sa unexplained wealth ug pagdumala sa confidential funds.
Ang Senate impeachment court maghimo og pre-trial conference sa Hunyo 18, samtang ang pormal nga impeachment trial gilauman nga magsugod sa Hulyo 6.
