GENSAN- Gipahibalo ni Barangay Lagao Captain Jaime Tatad nga adunay mga residente nga nagpabilin sa ilang mga panimalay bisan pa sa kadaot nga nahatag sa magnitude 7.8 nga linog tungod sa kahadlok nga mahimong makawatan ang ilang mga kabtangan.
Matod niya, bisan wala sila mibalhin sa evacuation centers, gilista gihapon sila sa barangay aron maapil sa mga posibleng ayuda ug pinansyal nga tabang nga ihatag sa lokal ug nasudnong panggamhanan.
Gipasalig usab ni Tatad nga padayon ang pagbantay sa mga apektadong lugar pinaagi sa tabang sa mga purok chairman, CVO ug mga residente nga nagtinabangay aron malikayan ang pagpangawat.
Sumala kaniya, adunay pipila ka kaso sa pagpangawat nga na-report human sa kusog nga linog ug mga aftershock, apan wala na kini nasundan tungod sa mas hugot nga pagbantay sa komunidad.
Gidasig usab sa kapitan ang mga taga-Lagao nga magmapailubon ug magsalig sa mga paningkamot sa gobyerno nga mangita og paagi aron matagaan og dugang nga suporta ang mga biktima sa kalamidad.
