Pormal nang gipaila sa House Prosecution Panel karong adlawa ang unang hugpong sa mga beteranong pribadong abogado nga mahimong kauban sa pagdumala sa impeachment trial ni Bise Presidente Sara Duterte sa Senado.
Sumala ni House Committee on Justice Chairperson ug lead prosecutor Gerville “Jinky Bitrics” Luistro, ang unang batch gilangkuban sa mga iladong litigator, kanhing mga opisyal sa gobyerno ug mga legal academic nga boluntaryong moserbisyo nga walay bayad o pro bono.
Lakip sa mga gipaila nga abogado sila kanhing Assistant Presidential Legal Counsel Marforth T. Fua sa PECABAR Law, veteran trial lawyer Lorna Kapunan sa Kapunan and Castillo Law Offices, ug UP College of Law lecturer Amando Virgil Ligutan sa SALiGAL Law.
Kauban usab sa grupo sila Atty. Erwin Matib, Atty. Justine Anne Lamarca, Atty. James Bryan Ibrahim, Atty. Sonya Margarita Benemerito Castillo, Atty. Deanne Melissa Lorenzo-Singian, Atty. Bettina Zamora ug Atty. Lino Chris Kapunan.
Matud ni House prosecutor ug Akbayan Party-list Representative Jose Manuel “Chel” Diokno, dako ang ikatabang sa mga pribadong abogado sa pag-organisar sa mga ebidensya ug pag-andam sa mga testigo sa dili pa sila motubag sa mga pangutana sa Senado.
Gipasabot usab ni Diokno nga kabahin kini sa tradisyon sa nasud, sama sa iyang pagserbisyo isip volunteer prosecutor atol sa impeachment trial ni kanhing Presidente Joseph Estrada.
Giklaro sa House prosecution panel nga magpabilin ubos sa ilang direktang pagdumala ug superbisyon ang mga pribadong abogado, subay sa mga lagda sa impeachment proceedings.
Gilauman usab nga magpaila pa ang Kamara og dugang nga mga batch sa private prosecutors sa umaabot nga mga semana sa dili pa opisyal nga magsugod ang impeachment trial.
