Gibutyag ni Fr. Stanley Dalagon Baldon, Parish Priest sa Holy Cross Parish sa Barangay Calumpang, nga adunay 71 ka mga Gagmay’ng Kristohanong Katilingban o GKK nga sakop sa ilang parokya nga maoy benepisyaryo sa mga bugas nga gidonar alang sa mga naapektuhan sa kusog nga linog.
Matud sa pari, ang mga bugas nga gikan sa donasyon sa Bombo Radyo Philippines Foundation Inc. ‘Oplan Kabalaka’ ang narepack na sa Bombo Radyo GenSan Team uban sa mga volunteers aron masiguro ang organisado ug patas nga pag-apod-apod niini ngadto sa mga pamilyang nanginahanglan og tabang.
Gipasabot ni Fr. Baldon nga pinaagi sa 71 ka GKK sa Holy Cross Parish, mas mapadali ang paghatod sa ayuda ngadto sa mga residente nga naapektuhan sa Magnitude 7.8 nga linog nga miigo sa General Santos City sa milabayng mga adlaw ug ubang bahin sa Mindanao.
Dugang pa niya nga dako kaayo ang maong tabang ilabina sa mga pamilyang naglisod karon tungod sa epekto sa kalamidad.
Ang maong donasyon gilauman nga makatabang sa pagtagbo sa nag-unang panginahanglan sa mga residente samtang nagpadayon ang ilang pagbangon gikan sa kadaot nga nahatag sa linog.
