Nagpabiling nagtorno ug naghulat sa gawas sa Bulaong Integrated Transport Terminal ang mga pampasaherong bus sa Dakbayan sa General Santos human sa gimandong temporaryong dili pa gamiton ang maong pasilidad tungod sa kaluwasan sa publiko.
Kini kasunod sa kusog nga Magnitude 7.8 nga linog nga miigo sa dakbayan ug ubang bahin sa Mindanao, diin gisusi pa sa mga otoridad ang kahimtang sa terminal aron masiguro nga luwas kini alang sa mga pasahero, drayber ug mga empleyado.
Tungod niini, ang mga bus nga nagbiyahe gikan sa nagkadaiyang ruta nagpabiling naghulat ug nagtorno sa mga gitakdang lugar gawas sa terminal samtang nagpaabot sa opisyal nga pahibalo kon kanus-a mahimong maablihan pag-usab ang pasilidad.
Padayon usab ang inspeksyon sa mga may kalabutan nga ahensya aron mahibaluan kon adunay mga kadaot nga mahimong makahatag og peligro sa mga mogamit sa terminal.
Gihangyo sa mga otoridad ang pagsabot ug kooperasyon sa publiko samtang nagpadayon ang mga assessment ug safety inspection. Matud pa nila, prayoridad sa kagamhanan ang kaluwasan sa tanang biyahero ug mga trabahante sa transportasyon sa dili pa tugotan ang normal nga operasyon sa Bulaong Integrated Transport Terminal.
