Opisyal nang gitapos ang search, rescue ug retrieval operations sa nag-collapse nga Savemore supermarket sa Barangay Calumpang human maretrieve ang ulahing missing person nga naapektuhan sa kusog nga Magnitude 7.8 nga linog.
Nagpahayag og dakong pasalamat si General Santos City Mayor Lorelie G. Pacquiao, nga maoy Chairperson sa City Disaster Risk Reduction and Management Council (CDRRMC), ngadto sa tanang ahensya, responders, volunteers ug mga partner organizations nga walay hunong nga mitabang ug miserbisyong tibuok-kasingkasing atol sa operasyon.
Matud sa alkalde, ang kalampusan sa maong misyon bunga sa hiniusang paningkamot ug koordinasyon sa nagkadaiyang mga grupo nga mitubag sa emerhensiya gikan sa unang adlaw sa insidente hangtod sa katapusan sa retrieval operations.
Lakip sa gipasalamatan sa lokal nga panggamhanan ang CDRRMO pinaagi sa Gensan Rescue Search and Rescue Team, Bureau of Fire Protection Search and Rescue Force gikan sa Regions 10, 11, 12, CARAGA ug BARMM, Philippine Coast Guard, Regional Mobile Force Battalion 12, Philippine Red Cross pinaagi sa ERU ug EMS Team, 525th Engineer Brigade, 1002nd “Bagwis” Infantry Brigade, MMDA K9 Search and Rescue Team, DCERT Volunteer Fire Brigade sa Cebu City, Police Station 10, Barangay Calumpang, City Engineering Office, City Health Office, Office of the Building Official ug Association of Structural Engineers.
Gipasalamatan usab ang tanang ahensya sa gobyerno, organisasyon, volunteers, pribadong mga partner ug mga indibidwal nga naghatag sa ilang panahon, kusog ug suporta aron matabangan ang mga biktima ug ilang pamilya.
