Gikumpirma sa Ateneo de Manila University ang kamatayon sa duha nila ka student-athletes human malumos atol sa team-building activity sa Dipaculao, Aurora niadtong Hunyo 8.
Ang mga namatay mao sila Rene Clert Baterbonia, 19 anyos, ug Divine Adili, 21 anyos.
Sa opisyal nga pahayag sa unibersidad, ilang gipadayag ang dakong kasubo ug pakigpahinungod sa pamilya, mga higala, teammates, coaches, ug mga pinalangga sa duha ka atleta. Gihangyo usab sa Ateneo community ang pag-ampo alang kanila atol niining lisod nga higayon.
Si Baterbonia, nga lumad sa Agusan del Sur, nailhan isip usa sa mga batid nga basketball player sa Davao Region. Niadtong 2025 Palarong Pambansa sa Ilocos Norte, nakadaog siya og gold medal uban sa iyang team ug nahimong Most Valuable Player o MVP.
Karong 2026, nanguna gihapon siya sa Davao Region atol sa gold medal match, apan napildi sila sa CALABARZON. Bag-o pa usab unta siyang nibalhin sa Ateneo campus sa Katipunan, Quezon City niadtong Hunyo 4 aron mag-andam sa iyang debut isip miyembro sa Blue Eagles sa Season 89 sa UAAP.
Samtang si Divine Adili, usa ka 6-foot-10 Nigerian student-athlete, nakaduwa uban sa Ateneo sa Season 88 ug nakatabang sa Blue Eagles nga makatapos nga adunay 6-8 nga rekord.
Padayon pa karon ang imbestigasyon sa mga otoridad kabahin sa nahitabong drowning incident.
