Nakuha ni Alex Eala ang kampyonato sa Birmingham Open human niya napildi ang Czech player nga si Nikola Bartunkova sa finals pinaagi sa 5-7, 6-3, ug 7-5 nga resulta sa Birmingham, United Kingdom.
Dako nga milestone kini alang kang Eala tungod kay kini ang iyang unang kadaugan batok sa usa ka Czech player sukad misulod siya sa WTA Tour. Sa wala pa ang finals, adunay 0-13 nga rekord si Eala kontra sa mga Czech opponents.
Bisan nakaangkon og lisod nga duwa, nakabawi gihapon ang Filipina tennis star ilabina sa deciding set diin iyang nakuha ang katapusang duha ka games aron maselyuhan ang kadaugan.
Matod kang Eala, dako niyang pasalamat ug karangalan ang maong titulo, apan giingon niyang padayon pa gihapon siya sa pagpaningkamot aron mas molambo pa sa iyang karera.
Kini na ang ikaduhang WTA 125 title ni Eala human sa iyang kadaugan sa Guadalajara Open sa Mexico niadtong miaging tuig.
Tungod sa maong kadaugan, naapil usab si Eala sa listahan sa mga bantugang tennis players nga nakadaog sa Birmingham Open sama nila Billie Jean King, Martina Navratilova, Maria Sharapova, ug Petra Kvitova.
