Gipaklaro ni Dr. Karl Igrobay, Assistant Department Head sa City Health Office, nga base sa datos sa Department of Health Region 12, mikabat na sa 900 ka HIV cases ang naitala sukad pa niadtong 2001 sa rehiyon.
Apan sumala kaniya, sa datos nga anaa karon sa Social Hygiene Clinic sa City Health Office, adunay 300 ka kaso nga padayon nga ginamonitor ug ginapa-ilalom sa pag-atiman ug pagtambal.
Dugang pa ni Dr. Igrobay, padayon usab ang pagsuta sa mga kaso nga gikan sa ubang tambalanan aron masiguro nga mahatagan dayon og hustong serbisyo medikal ug suporta ang mga pasyente.
Gibutyag usab sa DOH-12 nga misaka ang ihap sa HIV cases sa rehiyon niining unang quarter sa 2026 diin 277 ka bag-ong kaso ang naitala sa Region 12 gikan Enero hangtod Marso.
Tungod niini, padayon nga nag-awhag ang mga otoridad sa panglawas sa publiko nga magmatngon, magpraktis og luwas nga pamaagi aron malikayan ang HIV transmission, ug magpa-test aron mas sayong matambalan ang adunay impeksyon.
