Gipaklaro ni Dr. Bernard Bulawan sa Meat Regulation and Inspection Team Division nga nagpabiling anaa sa “green zone” category ang General Santos City may kalabutan sa African Swine Fever o ASF, nga nagpasabot nga luwas pa sa maong sakit ang syudad ug wala pay namatikdang kaso sa mga binuhing baboy.
Matud ni Bulawan, padayon ang monitoring ug inspeksyon sa lokal nga kagamhanan aron masiguro nga mapadayon ang kaluwasan sa hog industry sa syudad ug malikayan ang pagsulod sa ASF nga nakaapekto na sa ubang mga lugar sa nasud.
Samtang sa bahin sa mga imported pork products, gipahayag niini nga gitugotan lamang ang pagsulod ug pagbaligya sa mga produkto nga adunay kompletong import permits ug certificate of inspection isip pamatuod sa legalidad ug kalidad sa maong mga karne.
Gipatin-aw usab sa opisyal nga pwede nga mabaligya ang imported pork products apan kinahanglan kini nga perming anaa sulod sa chiller o freezer aron malikayan ang dali nga pagkadaot sa produkto.
Dugang pa niini, mas sensitibo ang imported frozen pork products kumpara sa lokal nga preskong karne sa baboy busa gikinahanglan ang husto nga pagtipig ug pagdumala niini aron mapanalipdan ang kahimsog sa mga konsumidor.
Padayon namang gipahimangnoan sa mga otoridad ang mga negosyante ug publiko nga mosunod sa food safety standards ug report dayon ang bisan unsang kahina-hinalang kaso nga may kalabutan sa ASF.
