Pormal nang gitapos ang 2026 Palarong Pambansa kagahapong Domingo, Mayo 31, sa Datu Lipus Makapandong Cultural Center nga nagtimaan sa pagtapos sa usa ka semana nga kompetisyon sa mga student-athletes gikan sa nagkadaiyang bahin sa nasod.
Sa closing ceremony sa ika-66 nga edisyon sa Palarong Pambansa, gisugdan ang programa pinaagi sa pagtapok sa mga atleta, gisundan sa unity parade ug opening production number.
Nasundan kini sa nagkadaiyang tradisyunal nga seremonya lakip ang pagpanaog sa bandila sa Pilipinas, Department of Education ug Palarong Pambansa, ingon man ang pagpalong sa kalayo sa Unity Cauldron.
Gipahibalo usab sa pagtapos sa programa ang mga nagdaog sa elementary ug secondary divisions lakip ang overall champion, Para Games winners, Top Five Performing Schools Division Offices, ug Most BemedaIled Athlete.
Lakip sa gipasidunggan si gold medalist Breanna Aaliyah Erno tungod sa iyang talagsaong performance sa swimming.
Ang Quezon City ubos sa pagpanguna ni Mayor Ma.Joy Belmonte maoy napiling host sa sunod nga edisyon sa Palarong Pambansa.
Gitapos ang programa pinaagi sa paghatag og plaque of appreciation, closing prayer, ug grand unity dance finale nga adunay tema nga “We Rise As One: The Ultimate Palaro Dream,” uban sa pag-apil sa mga lokal nga artista, opisyal ug delegasyon.
Ang Palarong Pambansa 2026 gipahigayon sa Agusan del Sur gikan Mayo 24 hangtod 31 diin gitambongan sa liboan ka mga atleta, coaches ug delegasyon gikan sa nagkadaiyang rehiyon sa nasod.
