Gipahibalo sa City Housing and Land Management Office nga permanente nang ibalhin ngadto sa Common Bone Chamber o Perpetual Area ang tanang mga patayng lawas nga dugay nang nalubong ug kasamtangang gibutang sa Storage 3, Storage 4, ug New Storage sa A. C. Acharon Memorial Park.
Ang maong lakang gihimo subay sa mga palisiya sa sementeryo kabahin sa pagdumala ug pag-organisa sa mga nahimutangan sa mga lubnganan sulod sa memorial park.
Gitambagan usab sa mga otoridad ang mga pamilya ug mga indibidwal nga adunay kabanay nga anaa sa maong mga storage area ang makig-coordinate dayon sa City Housing and Land Management Office o mobisita direkta sa opisina sa ACAMP aron mahimo dayon ang gikinahanglan nga aksyon ug dokumentasyon.
Wala pa gihatag sa mga otoridad ang eksaktong petsa sa pagbalhin, apan gilauman nga ipatuman kini sa labing duol nga panahon.
