GENSAN- Gilauman nga magpagawas ug usa ka makasaysayanon ug mahinungdanong desisyon ang Korte Suprema sa nasod karong umaabot nga Mayo 25 kalabot sa legalidad sa pagpatuman sa warrant of arrest gikan sa International Criminal Court.
Sa usa ka eksklusibong pakighinabi sa Bombo Radyo, gipahayag ni Atty. Rey Cartojano nga ang maong adlaw mamahimong usa ka “milestone decision” alang sa labing taas nga hukmanan.
Sumala kaniya, kaniadto pa gilikayan sa Korte Suprema nga lulutan o desisyonan ang maong isyu, lakip na sa panahon sa petisyon batok sa administrasyon ni kanhing Presidente Rodrigo Duterte, aron lamang malikayan ang direktang pagbangga o pag-clash sa ehekutibong departamento sa kagamhanan.
Apan sumala ni Cartojano, “hinog” ug justiciable na kaayo ang kahimtang karon tungod kay wala na’y laing katarungan ang korte gawas sa pag-atubang niini.
Gilauman nga sa Mayo 25, mahatagan na sa Korte Suprema og katin-awan ang tanang nagpalibot nga legalidad ug mga argumento, lakip na kung iagi ba kini sa mga lokal nga korte ug kung unsa ang mamahimong epekto niini ngadto sa mga personalidad nga gipanghinambitan sa warrant, sama ni Senador Ronald “Bato” dela Rosa.
