Gipasabot ni Alexandra Eala nga iyang gamiton ang tanang leksyon gikan sa iyang mga miaging torneo isip preparasyon alang sa umaabot nga French Open.
Ang 20-anyos nga Filipina tennis star ug Globe Ambassador mipunting na sa iyang bug-os nga pokus sa French Open nga magsugod sunod semana human sa iyang sayong kapildihan sa WTA 500 Strasbourg Open sa France.
Napildi si Eala ni Oleksandra Oliynykova sa score nga 6-3, 5-7, 3-6 sa unang round sa torneo. Ang maong kompetisyon usa ka preparasyon sa Roland Garros nga himuon gikan Mayo 24 hangtod Hunyo 7.
Bisan sa sayong pagkatangtang, nakahatag kini kang Eala og dugang panahon aron makapreparar sa iyang training base sa Rafael Nadal Academy sa Spain sa dili pa siya moatubang sa dagkong ngalan sa world tennis.
Usa ka adlaw sa wala pa ang iyang kapildihan, mibalik si Eala sa Top 40 sa world rankings isip World No. 38.
Si Eala usab nakasulay og sayong kapildihan sa pipila ka miaging clay tournaments sama sa Linz Open sa Austria, Porsche Tennis Grand Prix sa Germany, ug Madrid Open sa Spain. Apan usa sa iyang pinakamaayong performance karon mao ang iyang dagan sa Italian Open.
Gitinguha usab ni Eala nga mapalambo ang iyang performance sa French Open human siya mapildi sa unang round ni Emiliana Arango niadtong miaging tuig.
Isip usa na ka Top 50 player, awtomatiko nang naapil si Eala sa main draw sa singles ug doubles sa French Open. Sa doubles, makigdungan siya sa rising Canadian star nga si Victoria Mboko sa unang higayon.
