Misaka na sa kapin sa 100 ang ihap sa mga namatay tungod sa Ebola sa Democratic Republic of the Congo, nga adunay kapin sa 390 ka gidudahang kaso, sumala sa Africa Centres for Disease Control and Prevention.
Natala usab ang virus sa Uganda, diin adunay duha ka kumpirmadong kaso ug usa ka kamatayon.
Lakip sa mga kumpirmadong nataptan mao ang usa ka Amerikanong doktor sa DRC, kinsa ipadala sa Germany alang sa pagtambal.
Gikataho usab nga adunay mga Amerikano nga posibleng nataptan, nga gitabangan karon sa gobyerno sa United States.
Gideklarar na sa World Health Organization ang outbreak isip usa ka public health emergency nga gikabalak-an sa internasyonal, apan gipatin-aw nga layo pa kini sa pandemya.
Bisan pa niini, nagpasidaan ang ahensya sa estrikto nga pagsunod sa burial protocols tungod sa taas nga risgo sa transmission.
Ang mga silingang nasud sama sa Rwanda ug Nigeria nagpatuman usab og border screening aron mapugngan ang pagkatap sa virus.
Sumala sa Centers for Disease Control and Prevention, ubos ang risgo sa Estados Unidos apan padayon nilang ginabantayan ang mga biyahero gikan sa mga apektadong lugar. Nagpagawas usab ang US og Level 4 travel advisory alang sa DRC.
Sa pagkakaron, walay aprobahan nga tambal o bakuna batok sa Bundibugyo strain sa Ebola, busa ang WHO ug Africa CDC nanawagan sa publiko nga sundon ang mga protocol ug palig-onon ang community surveillance aron mapugngan ang pagkatap sa virus.
