Nagpagawas na og pahayag ang International Criminal Court (ICC) kalabot sa report nga adunay arrest warrant matod pa batok kang Senador Ronald “Bato” Dela Rosa.
Giklaro sa ICC nga wala pa silay gipagawas nga public arrest warrant nga may kalabotan sa Pilipinas.
Gipahimangnoan usab sa ICC ang publiko nga mamati lamang sa opisyal nga mga pahayag ug likayan ang pagpakaylap og mga impormasyong wala pa napamatud-an gikan sa online.
Una nang miingon si Interior Secretary Jonvic Remulla nga nag-andam na sila og mga 10,000 ka task force para sa posibleng pag-dakop sa senador kung mogawas ang warrant gikan sa ICC.
Apan giangkon ni Remulla nga wala pa siya nakadawat og bisan unsang kopya sa maong arrest warrant gikan sa ICC.
Matod pa, si Dela Rosa kaniadto nagsilbing PNP chief sa panahon ni kanhi Presidente Rodrigo Duterte, nga karon ginalambigit sa kaso may kalabotan sa madugo nga “war on drugs” nga gipasaka sa ICC.
