Nagpagawas og opisyal nga pahayag niadtong Sabado, Mayo 9, ang Partido Demokratiko Pilipino (PDP) kalabot sa migawas nga report mahitungod sa giingong warrant of arrest gikan sa International Criminal Court (ICC) batok kang Senador Ronald “Bato” Dela Rosa.
Sumala kang PDP Vice National Spokesperson Ferdinand Topacio, kung mapamatud-an nga tinuod ang maong warrant, kini matod pa usa na usab ka grabeng paglapas sa soberanya ug kagawasan sa Pilipinas isip usa ka independenteng nasod.
Gibatikos usab sa partido ang administrasyong Marcos tungod sa giingong padayon nga pakig-uban niini sa ICC bisan pa sa pagbiya sa Pilipinas sa Rome Statute.
Giingon sa PDP nga ang gobyerno kinahanglan magpugos sa kaugalingong hurisdiksyon ug dili tugotan nga maapektuhan ang dignidad sa usa ka gawasnon nga nasod, ug dili maglihok isip “neo-colonial lapdog” sa mga Western powers.
Giingon pa nila nga dili angay pasagdan nga mausab ang giingong kahadlok ug pagluib nga nahitabo kaniadto batok sa kanhi Presidente Rodrigo Duterte.
“Marcos must remember that one mistake cannot be corrected by another one,” matod pa sa partido.
Gipasiugda usab sa PDP nga si Dela Rosa gipili sa milyon-milyon ka Pilipino ug angay lamang nga mapanalipdan ang iyang mga katungod ug due process.
Mipasalig ang partido nga gamiton nila ang tanang legal nga paagi aron depensahan dili lang si Senador Dela Rosa kondili ang katungod sa matag Pilipino batok sa giingong abuso ug pamulitika.
Nag-awhag usab ang PDP sa publiko nga supakon ang bisan unsang lakang nga ilang giingong paglapas sa katungod sa mga tawo, pinaagi sa mga paagi nga uyon sa balaod.
