Gikumpirma sa Department of Migrant Workers (DMW) nga samdan ang pito ka Pilipinong seafarers human maigo sa Iranian drone attack ang ilang barko nga Maltese-flagged container ship nga CMA CGM San Antonio.
Sumala ni DMW Secretary Hans Leo Cacdac, ang tanang pito ka Pilipinong tripulante naluwas sa pag-atake apan nasamdan ug karon ginahatagan og medikal nga atensiyon sa ospital.
Matod niya, upat kanila ang adunay minor injuries samtang tulo ang anaa sa seryosong kahimtang ug ginabantayan pag-ayo.
Sa karon, gi-monitor sa mga opisyal sa Philippine Embassy ug labor attaché ang kondisyon sa mga nasamdan nga Pinoy ug nakig-ugnayan na sila sa mga hospital authorities.
Nahitabo ang insidente samtang ang barko nagagiya sa Strait of Hormuz, nga giisip karon nga high risk ug warlike area tungod sa tensiyon tali sa US, Israel, ug Iran.
