Gikalot sa usa ka lalaki ang patayng lawas sa iyang igsoon ug gidala kini sa bangko isip “proof of death” aron maabrihan ang bank account sa namatay sa Odisha, India.
Sumala sa report, pipila na ka semana siyang naningkamot nga ma-access ang kuwarta sa iyang igsoon nga namatay tungod sa sakit niadtong Enero.
Nangayo ang bangko og mga dokumento sama sa death certificate aron ma-release ang kapin 19,000 rupees o sobra P12,000 nga deposito.
Apan tungod kay wala niya masabti ang proseso, iyang gihimo ang pagkalot sa patay’ng lawas ug gidala kini sa bangko isip tubag sa ilang gipangayo.
Matod sa mga awtoridad, miyembro siya sa usa ka tribo ug walay edukasyon, hinungdan nga wala niya nasabtan ang pamaagi, ug napakyas usab ang mga opisyal sa bangko sa pagpasabot niini.
Sa ulahi, gitabangan siya sa mga awtoridad aron makuha ang kuwarta ug gilubong pag-usab ang lawas sa iyang igsoon.
