GENSAN- Nakadawat ang 350 ka mag-uuma ug mananagat sa Barangay Buayan og 10 kilo nga rice subsidy gikan sa lokal nga panggamhanan sa General Santos City ubos sa pagpanguna ni Mayor Lorelie Geronimo Pacquiao.
Ang maong hinabang gipasiugdahan pinaagi sa City Agriculturist’s Office nga gipangulohan ni Acting Department Head Elsie Villanueva, isip kabahin sa padayon nga suporta sa sektor sa agrikultura ug pangisda.
Gihimo ang distribusyon sa barangay uban ang kooperasyon ni Punong Barangay Rogelio Solis Sr., aron masiguro nga maabot dayon ang tabang sa mga benepisyaryo.
Sumala sa lokal nga panggamhanan, tumong niini ang pagtabang sa panginabuhian sa mga mag-uuma ug mananagat ilabina sa pagsaka sa presyo sa mga nangunang palaliton.
Gipadayag usab ni Mayor Pacquiao nga magpadayon ang ilang mga programa nga motubag sa panginahanglan sa mga nag-unang sektor sa komunidad.
Gilauman nga pinaagi niini, mapalig-on pa ang produksyon sa agrikultura ug pangisda sa siyudad.
