Nagsang-at og reklamo si Atty. Manases Reyes Carpio, bana ni Vice President Sara Duterte, sa Quezon City Prosecutor’s Office batok sa mga opisyal sa Bangko Sentral ng Pilipinas (BSP), Anti-Money Laundering Council (AMLC), ug pipila ka mga representante sa House of Representatives.
Apil sa mga ginganlan sa reklamo sila si BSP Governor Eli Remolona Jr., AMLC Executive Director Ronel Buenaventura, ug mga miyembro sa House Justice Committee nga sila Reps. Gerville Luistro, Percival Cendaña, Chel Diokno, ug Leila De Lima.
Base sa kampo ni Carpio, ang reklamo may kalabutan sa giingong paglapas sa Anti-Money Laundering Act, Bank Secrecy Law, ug Data Privacy Act. Giakusahan niya ang mga opisyal nga ilegal nga gibutyag ang “classified confidential banking records” nga protektado sa balaod.
Matod pa sa ilang panig, napugngan siya sa kahigayunan nga makahatag og legal nga depensa alang sa iyang kaugalingon, pamilya, ug bisan sa banking community.
Gipasabot usab sa iyang abogado nga dili sakop sa reklamo ang kamatuoran sa mga gipagawas nga “suspicious transactions” sa House Justice Committee, kundili nakatutok lamang sa giingong paglapas sa mga naglungtad nga balaod.
Sa maong pagdungog, gitaho sa AMLC nga adunay kapin P6 bilyon nga mga transaksyon nga konektado kang Carpio ug sa Bise Presidente, lakip na ang P4.525 bilyon nga nisulod sa ilang mga account, P1.554 bilyon nga nigawas, ug P791 milyon nga wala matino kung inflow ba o outflow.
Gitawag ni Carpio ang maong pagbutyag nga “black propaganda” ug “political harassment” nga tumong nga gub-on ang reputasyon sa pamilya Duterte.
Dugang pa sa iyang legal counsel, si Carpio usa ka pribadong indibidwal ug dili apil sa impeachment proceedings.
