GENSAN- Gipatin-aw ni Atty. Rogelio Garcia nga kon tinuod man nga adunay gitawag nga suspicious transaction report (STR) sa mga bank records ni Vice President Sara Duterte, kinahanglan unta kini dayon i-flag sa bangko ug mahimo pa gani nga i-freeze samtang giimbestigahan.
Apan giingon niya nga wala kuno nahitabo nga pag-freeze o pag-hold sa account, busa nagpasabot nga giisip gihapon kini nga normal nga transaksyon sa adlaw-adlaw nga operasyon sa account.
Gipatin-aw niya nga ang STR usa lamang ka suspetsa ug wala pa kini nagpasabot nga adunay illegal nga transaksyon o illegal nga gigikanan sa pondo. Gidugang pa niya nga bisan kinsa nga dako og deposito mahimong ma-classify isip STR, apan dili kini automatic nga nagpasabot og kalapasan sa balaod.
Wala usab kuno aksyon ang bangko sama sa pag-istrikto sa account, nga nagpakita nga wala pa kini giisip nga seryosong kaso nga kinahanglan i-freeze.
Giingon pa niya nga ang maong isyu mahimong nagmugna lang og sayop nga impresyon sa publiko nga mosangpot sa pagduda sa “unexplained wealth,” nga iyang giingong dili patas ug makalibog sa katawhan.
