Gipahibalo ni U.S. President Donald Trump nga ang Estados Unidos mopatuman og naval blockade sa Strait of Hormuz human sa kapakyasan sa peace talks tali sa Iran ug pipila ka mga nasud nga gipahigayon sa Islamabad, Pakistan.
Sa usa ka post sa Truth Social, si Trump miingon nga ang U.S. Navy magsugod dayon sa pagbabag sa tanang barko nga mosulod ug mogawas sa oil port. Sumala niya, ang tumong mao ang pagpugong sa Iran sa giingong pagkolekta og “illegal tolls” gikan sa mga barko.
Dugang ni Trump nga ang ubang mga nasud moapil usab sa blockade, ug nga ang Iran dili tugutan nga makaganansya gikan sa sitwasyon samtang apektado ang global nga ekonomiya.
Nagpasidaan usab si Trump nga ang U.S. Navy mosakmit o mobabag usab sa tanang barko sa internasyonal nga katubigan nga giingong nagbayad og “tolls” sa Iran baylo sa pag-agi sa Strait of Hormuz.
Ang Strait of Hormuz usa sa labing importante nga oil port sa kalibutan, diin moagi ang dakong bahin sa suplay sa petrolyo sa kalibutan.
Busa, ang bisan unsang blockade sa Strait mahimong adunay mas lapad nga epekto sa global nga ekonomiya.
Sa pagkakaron, wala pa’y opisyal nga kumpirmasyon gikan sa US Department of National Defense.
