Pauli na sa Earth karong adlawa ang mga astronaut sa Artemis II human sa ilang makasaysayanong biyahe palibot sa bulan.
Sumala sa NASA, ang Orion spacecraft nga gisakyan sa crew gikatakdang mutugpa sa Pacific Ocean human sa ilang re-entry sa athmosphere sa Earth.
Ang maong landing maoy pamaagi nga gigamit sa kadaghanang space missions, diin ang Capsule hinay-hinay nga motugpa sa dagat gamit ang parachutes aron masiguro ang kaluwasan sa mga astronaut.
Sumala sa report, ang reentry operations nagsugod kaganinang ala 1:50 sa kaadlawon, ug unyang alas 7:33 sa buntag, ang Orion spacecraft makita nga mobulag gikan sa service module niini. Samtang mosulod kini sa atmosphere sa Earth, ang temperatura gilauman nga moabot hangtod sa 3,000°C tungod sa grabe nga aerodynamic heating.
Ang mga parachute gilauman nga moabli unyang alas 8:03 sa buntag , aron mapahinay ang pagkahulog sa spacecraft sa dili pa ang gipaabot nga pagsabwag mga alas 8:07 sa buntag.
Gilauman nga andam na ang mga rescue team sa maong lugar aron dayon nga masagip ang crew ug masiguro ang ilang kahimtang human sa ilang misyon sa kawanangan.
Ang pagbalik sa Artemis II crew giisip nga laing dakong lakang sa padayon nga eksplorasyon sa kawanangan ug pag-andam sa umaabot nga mga misyon paingon sa bulan ug sa mas layo pang destinasyon.
